Exito de la Mani contra la represion

De nuestros amigos de GLAYIU:
Ayeri xueves 29 marzu más de 2.000 persones percorrieron les cais de Xixón con motivu de la segunda gran movilización convocada pola Plataforma contra la Represión y poles Llibertaes, desixendo xusticia pa Cándido y Morala y denunciando los numberosos casos de represión exercíos nos últimos tiempos n’Asturies.

Pasaes les 7:30 la tarde entamaba a caminar la manifestación, encabezada por una pancarta portada por delles de les víctimes d’esta represión, como Cándido, Morala, Marco Antuñao el colectivu de trabayadores de Teleasturias, y na que se lleía’l lema “NO A LA REPRESIÓN DE LAS LUCHAS”. Siguíen-y dellos cortexos de colectivos y organizaciones como’l PCE, PCPE, IAS, Darréu, CSI, Sindicato de Estudiantes y FUSOA. Yera esti últimu quizás el cortexu más animáu, gracies a la presencia d’una camioneta descubierta parcialmente y na qu’había una sesión DJ en directu y la participación del grupu de hip-hop K-Nalón, qu’interpretó dellos de los sos temes.

La manifestación, dempués de salir de l’Acerona, trescurrió pacíficamente peles cais Álvarez Garaya, Moros, Xovellanos, San Bernardo hasta llegar a la Plaza Conceyu pasaes les 8:15 la tarde. Los lemes más coreaos fueron “Toos somos Cándido y Morala” y “Trevín, facista, tú yes el terrorista”. Durante la manifestación hebio una pegada masiva, sobre too nes dos oficines de Cajastur peles que pasó’l percorríu y en bona parte del mobiliariu urbanu, de pegadielles colos lemes “EsPEZculación STOP” “Otra Caja ye posible, Menéndez dimisión” o “Quién sema inxusticia recueye rabia” ente otros. A destacar la escasa presencia d’efectivos de la llamada Policía Nacional, que se preveía mayor una hora antes al ser avistaos 4 miembros de la llamada Unidá d’Intervención Policial peles cais del céntricu barriu del Carmen, anque quizás la so busca nun yera de terroristes urbanos sinon d’un simple chigre onde tomar unes cañes.

Yá na Plaza Conceyu, Cándido garró la pallabra p’anunciar a los y les presentes la realización de diverses movilizaciones de sofitu a Cándido y Morala por una parte, y a Marco Antuña, despedíu de Cajastur por otra, en ciudaes del Estáu español tales como Barcelona, Madrid, Valladolid, Granada y Córdoba. Darréu garraron la pallabra’l propiu Marco Antuña y un representante de los trabayadores de Teleasturias, qu’ufrieron a los y les concentraes na Plaza Conceyu una visión sobre la situación pasada y presente de los sos conflictos llaborales.